28.11.2017, 23:32

Пор-Бажын һәққидә һөҗҗәтлик фильм көрситилди

  • 310
  • 0

Мәлумки, буниңдин икки жил илгири «Инайәт» ассоциациясиниң рәиси мәрһум Турған Розахуновниң тәшәббуси билән Тува тәвәсидики Пор-Бажын қәлъәсигә мәхсус экспедиция уюштурулған еди. Өткән җүмә күни Алмута шәһиридики «Астана» меһманханисида әйнә шу экспедиция давамида чүширилгән видеороликлар асасида «Вақитни тохтатқан – Пор-Бажын» намлиқ һөҗҗәтлик фильмниң тонуштуруш мәрасими болуп өтти. 

Фильмни көрситиштин илгири, экспедиция әзалири — тарих пәнлириниң доктори Абләһәт Камалов, Әмгәкчиқазақ наһийәлик Уйғур этномәдәнийәт мәркизиниң рәиси Майдин Абдуллаев вә «Инайәт» ассоциацияси рәисиниң вәзиписини вақитлиқ атқурғучи Сүлфи Мәшрәпов өз дәвридә, йәни ХІІІ әсирдә уйғур қағани Билгә қағаниниң пәрмани билән Терехол дәриясиниң оттурисидики аралға селинған бу қәлъәни зиярәт қилиш давамида алған тәсиратлири билән бөлүшүп, у йәрдики йәрлик аһали өзлирини уйғурларниң әвлатлири екәнлиги билән пәхирлинидиғанлиғини алаһидә тәкитлиди. Шундақла уларниң айрим урпи-адәтлиридики вә тилидики охшашлиқларниң нурғунлиғи тоғрилиқ экпедицияниң йәнә бир әзаси Исмайилҗан Иминовниң қәлимигә мәнсүп китап нәшир қилинғанлиғи тоғрисидиму ейтип өтти. Андин тамашибинлар һөҗҗәтлик видеофильмни тамашә қилди. 

Ушбу мәрасимға қәдәм тәшрип қилған Түрксой хәлиқара җәмийити Баш кативиниң орунбасари Фырат Пурташ сөзгә чиқип, алған тәсиратлири билән бөлүшти һәм уйғурларниң һәқиқәтәнму түркий хәлиқләр арисида қедимий хәлиқ екәнлигини қәйт қилди. Кейинки натиқлар. җүмлидин медицина пәнлириниң доктори Турғанҗан Сопиев вә Р.Сулейменов намидики Шәриқшунаслиқ институти Уйғуршунаслиқ мәркизиниң рәиси, тарих пәнлириниң доктори Рисаләт Кәримова фильм һәққидики пикирлирини оттуриға селип, униң тарихий әһмийитигә тохталди. Шундақла фильм ишлигүчиләргә қәлъә тарихини тамашибинға раван тил баян қилиш арқилиқ һәммә тәрипини ениқ йәткүзгәнлигигә миннәтдарлиқ билдүрди. 

Ахирида Сүлфи Мәшрәпов экспедиция әзалириға вә фильмни ишләш җәриянида маддий һәм мәнивий җәһәттин яр-йөләк болған барлиқ милләтпәрвәр һамийларға «Инайәт» ассоциациясиниң пәхрий ярлиқлирини тапшурди.

Мәшүр САСИҚОВ, «Уйғур авази»

Сүрәтләрни чүшәргән Бавдун Умар

 


Поделиться с друзьями:

Комментарии (0)