Дадаш Бабажанов
1922-жили Җамбул наһийәсиниң Узунағаш йезисида туғулған. Мәзкүр йезидики Крупская намидики қазақ оттура мәктивини тамамлайду. 1941-жили армия сепигә чақиртилип, дәсләп 213-атлиқ полк мәктивидә оқуйду. 1942-жили Шималий Кавказ фронтида тунҗа қетим җәңгә қатнишиду. Дондики Ростов шәһири үчүн болған җәңләрниң биридә еғир яридар болиду. Госпитальда бираз давалинип, қайтидин җәңгә кириду. Кейин у Никополь шәһиридики җәңләрдә қоманданлиқниң көзигә чүшиду. Шу пәйттә әрлиги үчүн үчинчи дәриҗилик «Шөһрәт» орденини елишқа муйәссәр болиду. Көп өтмәй Сиваш линиясини бесип өтүш җеңигә иштрак қилип, «Җасарити үчүн» медали билән мукапатлиниду.
1944-жили майда Кеңәш әскәрлири Севастополь шәһириниң босуғисиға йетип кәлгән еди. Шәһәр алдида Сапун теғи мәғрур баш көтирип туратти. Ким мошу тағни егилисә, у шәһәрни егилигән болатти. 7-май күни әйнә шу Сапун теғини елиш үчүн җәң 9 саатқа созулиду. Дадаш Бабажанов хизмәт қиливатқан полкқа полк байриғини тағниң чоққисиға қадаш вәзиписи жүклиниду. Бабажанов сәпдашлири Кузнецов билән Михайловни елип, Сапун теғиға қарап йол тутиду. Дүшмәнниң ямғурдәк йеғиватқан оқи уни икки сәпдишидин айриди. Униң қулиғида рота командириниң «саңа ишинимән» дегән сөзи яңравататти. Шундақ қилип, у қолидики байрақни яғичидин чиқирип белиға бағлайдидә, һәрикитини давам қилиду. Ахири у полк байриғини тағниң чоққисиға тикләйду. Шундақла у үч немис солдити билән бир офицерини әсиргә чүширип, елип келиду.
СССР Алий Кеңиши Президуминиң 1945-жили 24-марттики пәрманиға бенаән Бабажанов хизмәт қиливатқан дивизияниң 17 җәңчисигә Кеңәш Иттипақиниң Қәһримани нами берилиду. Уларниң ичидә узунағашлиқ уйғур җәңчиси Дадаш Бабажановму болди.
Старшина Дадаш Бабажанов уруш аяқлашқандин кейин туғулған жутиға қайтип келиду. Һәҗәрбүви исимлиқ қизға өйлинип, үч оғул, үч қиз тапиду. У 1946 — 1947-жиллири Җамбул наһийәлик партия комитетида инструктор болуп ишләйду. 1949 — 1951-жиллири Қазақстан Компартияси Мәркизий Комитетиниң йенидики Алий партия мәктивидә билим алиду. Оқушни муваппәқийәтлик пүтирип, 1951 — 1953-жиллири Балқаш наһийәсидики Тасмурун МТСта мудирниң сәясий ишлар бойичә орунбасари, 1953 — 1955-жиллири Челәк наһийәси Қаратуруқ МТСта партия тәшкилатиниң кативи, 1955 — 1961-жиллири Җамбул наһийәлик мәдәнийәт бөлүминиң башлиғи, 1961 — 1971-жиллири Җамбул наһийәлик коммунал карханилири комбинатиниң мудири, 1977 — 1985-жиллири, йәни һаятиниң ахириғичә Узунағаш йеза кеңиши рәисиниң орунбасари вә кейинирәк рәиси лавазимлирида ишләйду. У 1985-жили һаяттин өтти. Узунағаш йезисидики чоң кочиларниң бири Қәһриманниң нами билән атилиду.
